Die sake-organisasie Business Leadership SA het sy lede aangemoedig om werknemers toe te laat om hulle reg tot staking uit te oefen tydens vandag se landwye massa-optrede teen staatskaping, korrupsie en werksverlies.
Die staking deur Cosatu en die SA Kommunisteparty volg op die onlangse opmerking deur die minister van Ekonomiese Ontwikkeling, Ebrahim Patel, dat korrupsie die land jaarliks minstens R27 miljard en 76 000 verlore werksgeleenthede kos.
Die Kaapse Kamer van Handel en Nywerheid steun ook die stryd teen korrupsie en staatskaping, maar glo nie ‘n staking sal ‘n verskil maak nie.
Die polisie het Suid-Afrikaners die versekering gegee dat voldoende maatreëls getref is om wet en orde te handhaaf tydens die talle optogte wat landwyd gehou word.
Verskeie wetstoepassingsagentskappe word ontplooi in al die groot stede en ander gebiede waar probleme verwag word.
Die polisie sê geen misdadigheid, intimidasie of enige vorm van wetteloosheid sal geduld word nie.
The post Polisie is gereed vir vandag se landwye staking appeared first on Radio Rosestad 100.6FM.