‘n Algemene praktisyn van Lephalale, Werner Emslie, is gisteraand op sy plaas
buite die dorp doodgeskiet.
Emslie, sy vrou en dogter is vroegaand deur verskeie gewapende mans oorval.
Sy vrou Mariëtte, ook ‘n mediese dokter, en dogter Barbara is gewond.
Mariëtte is erg aangerand en is in ‘n kritieke toestand na Pretoria gehaas vir mediese behandeling.
Die aanvallers het met Mariëtte se voertuig gevlug wat later verlate naby die plaas gevind is.
‘n Woordvoerder van die polisie, John Masia, sê geen inhegtenisnemings is nog gedoen nie.
Die aanval op die Emslies volg nadat die minister van Polisie, Fikile Mbalula,
gesê het die meerderheid van Suid-Afrika se boere is nie rassiste nie en behoort beskerm te word.
Hy het in Pretoria met die media gepraat oor plase en landelike gebiede en sê daar moet ‘n plan gemaak word met plaasmoorde en –aanvalle.
Vier plaasmoorde is verlede maand binne 48 uur gepleeg.
Die minister sê die polisie en Agri Suid-Afrika gaan ‘n ooreenkoms onderteken met planne om misdaad op plase en in landelike gebiede teen te werk.
The post Plaasaanval: Algemene praktisyn doodgeskiet appeared first on Radio Rosestad 100.6FM.