‘n Lid van die ANC se Nasionale Uitvoerende Komitee, Mathole Motshekga, het benadruk dat die leierskap as geheel nie betrek kan word by die optrede van ‘n paar individue nie.
Hy het gereageer op die verslag oor staatskaping waarin president Jacob Zuma, die minister van minerale hulpbronne, Mosebenzi Zwane, en die minister van samewerkende regering, Des van Rooyen onder meer genoem word oor vermeende onbehoorlike bande met die Gupta-familie.
Motshekga se standpunt is strydig met dié van die ANC-hoofsweep, Jackson Mthembu, dat die ANC leierskap kollektiewe aanspreeklikheid moet aanvaar.
Die Presidensie sê intussen hy oorweeg dit om ‘n formele klag te lê by die Kantoor van die Openbare Beskermer oor die beweerde uitlek van ‘n klankopname van ‘n vergadering tussen die vorige Openbare Beskermer, Thuli Madonsela, en President Zuma.
In die onderhoud kan gehoor word hoe Madonsela sukkel om antwoorde te kry by Zuma se prokureur, Michael Hulley, en Zuma self oor sy verhouding met die Gupta-familie.
‘n Woordvoerder vir die openbare beskermer sê ‘n interne ondersoek sal ingestel word om vas te stel hoe die betrokke opname uitgelek het.
The post MOTSHEKGA REAGEER OP STAATSKAPINGVERSLAG appeared first on Radio Rosestad 100.6FM.