Die EFF, die DA en ander opposisiepartye het die ANC gister in van die groot metro’s en elders tot in die politieke woestyn geboender.
Die DA het gister ’n koalisie-ooreenkoms met die UDM, die ACDP en Cope vir politieke beheer in die Nelson Mandelabaai-metro gesluit.
Die EFF en die DA het ook onderneem om die IVP te help om hangrade in KwaZulu-Natal van die ANC af te rokkel, in ruil vir IVP-steun in Gauteng.
Politieke ontleders is dit egter eens dat die EFF-leier, Julius Malema, tans met die hef in hand sit.
Die algemene siening oor die informele ooreenkoms wat die EFF aangegaan het om veral die DA in beheer van metro’s soos Tshwane en Johannesburg te plaas, is dat dit stadsrade se bestuur baie vinnig kan verlam en dat dit net tot korttermynvoordeel van die DA is.
Malema het gister in Alexandra naby Sandton dit duidelik gestel die doelwit is om te verseker dat die ANC nie regeer nie, dat hulle tussen twee duiwels, die DA en die ANC, moes kies en op die mindere duiwel, die DA, besluit het.
The post DA, EFF EN ANDER PARTYE WERK SAAM appeared first on Radio Rosestad 100.6FM.