Die Minister van Justisie en Korrektiewe Dienste, Michael Masutha, het bevestig dat hy die hoof van die Nasionale Direktoraat van Openbare Vervolgings, Shaun Abrahams, na Luthuli-huis genooi het om die situasie op universiteitskampusse te bespreek.
Hy sê hy het nie gedink dat dit ‘n probleem sou wees nie.
Masutha het tydens ‘n mediakonferensie in Pretoria gesê hy is op kort kennisgewing deur President Zuma na die ANC-hoofkwartier genooi, en omdat hy nie al die inligting beskikbaar gehad het oor die vervolging van studente nie, het hy Abrahams saamgenooi.
Masuthu sê hy was onder die indruk dat die Nasionale Direktoraat van Openbare Vervolgings enige gebou kan betree en vergaderings kan bywoon solank dit nie onwettig is nie.
Hy sê vir hom was die dringendheid van die saak die belangrikste.
Masuthu het vroeër gesê dit bekommer hom dat politieke partye verkies om eerder by die howe te gaan aanklop as om debatte in die parlement te gebruik om kwessies te opper.
Hy het kommentaar gelewer op die DA se dringende aansoek om die grondwettigheid van die regering se besluit om te onttrek aan die Internasionale Strafhof te betwis.
Masuthu sê hy verstaan nie die dringendheid van die aansoek nie omdat dit ‘n jaar sal neem om die nodige wetgewing te bekragtig wat Suid-Afrika sal toelaat om te onttrek.
The post ABRAHAMS GENOOI OM STUDENTE TE BESPREEK appeared first on Radio Rosestad 100.6FM.