‘n Klubhuis op die hoofkampus van die Nelson Mandela Universiteit in Port Elizabeth is in die vroeë oggendure aan die brand gesteek en in puin gelê.
Dit nadat die raad van die universiteit bekend gemaak het dat die universiteit weer vanoggend heropen en klasse môre voortgesit gaan word.
Lede van die FeesMustFall-veldtog sê die universiteit het in kwader trou opgetree en dat hulle sal verseker dat die universiteit gesluit bly.
Studente van die Universiteit van die Witwatersrand het ook vanoggend weer amok gemaak toe hul verkeer in Parktown ontwrig en brande gestig het.
Die polisie is ook met klippe gegooi.
Die ANC en sy alliansievennote het vroeër ‘n beroep op universiteitstudente gedoen om na hul klasse terug te keer.
Die ANC se sekretaris-generaal, Gwede Mantashe, en sy eweknië van die SAKP, Cosatu en Sanco het in ‘n gesamentlike verklaring gesê hulle is bekommerd oor die skadelike langtermyn impak wat die sluiting van universiteite op studente en die samelewing sal hê.
Hulle het ook die Heher-kommissie gevra om sy ondersoek na universiteitsklasgeld te bespoedig.
The post KLUBHUIS BY NMU AAN DIE BRAND GESTEEK appeared first on Radio Rosestad 100.6FM.