Die VF Plus doen opnuut ʼn beroep op landbouers om sekuriteitsmaatreëls in plek te stel, by veiligheidsnetwerke in te skakel en hulself en hul werkers weerbaar te maak.
Die VF Plus het ook sy afgryse uitgespreek met die drie moorde wat op Donderdag 20 April 2017 op plase in die Wepener- en Ladybrand-distrikte gepleeg is.
Jan van Niekerk, provinsiale leier van die VF Plus in die Vrystaat, sê dit is duidelik dat boere en plaaswerkers sagte teikens vir misdadigers is en dat hierdie kriminele geen respek vir lewe het nie.
“Die Landelike Beveiligingsplan van die regering faal en laat die landbougemeenskap weerloos,” sê Van Niekerk
“Die regering sal ernstig moet besin oor landelike beveiliging en hierdie tipe misdade as prioriteit verklaar.”
Hy het namens die VF Plus medelye met die families van die slagoffers betoon en ʼn ernstige beroep op die polisie gedoen om alles in hul mag te doen om die skuldiges aan die pen te laat ry.
The post Boere moet hulself weerbaar maak – VF+ appeared first on Radio Rosestad 100.6FM.