AfriForum se Bloemfontein-buurtwagte het die afgelope naweek aan dié burgerregte-organisasie se nasionale patrollie deelgeneem. Sowat 186 patrolleerders – elkeen ’n buurtwaglid – het aan die patrollie deelgeneem, tesame met die Suid-Afrikaanse Polisiediens (SAPD) en verskeie privaat sekuriteitsmaatskappye.
“Al sewe buurtwagte in Bloemfontein het aan die patrollie deelgeneem. Die SAPD, Chubb, Bloemsec, Nissi, ITR, Senforce, VR Security, Trauma Response Afrika en Life Rosepark-ambulansdienste het ook deelgeneem,” sê Pieter Myburg, AfriForum se distrikskoördineerder vir Bloemfontein.
Myburgh sê voorts dat die patrolleerders Bloemfontein tussen Vrydagaand 20:00 en Saterdagoggend 5:00 in skofte van drie ure elk met 127 voertuie gepatrolleer het.
“Die patrollie was op misdaadvoorkoming en die sigbaarheid van veiligheidstrukture toegespits. Daar is in totaal bykans 6 993 km afgelê. Geen ernstige voorvalle van misdaad is tydens die patrollie aangemeld nie. Patrolleerders het ook onder meer gehelp om verkeer te reguleer op vier plekke waar ongelukke plaasgevind het.”
Raak vandag betrokke deur “Veilig” na 45266 te SMS (R1).
The post AFRIFORUM SE BFN-BUURTWAGTE DEEL VAN PROVINSIALE PATROLLIE appeared first on Radio Rosestad 100.6FM.