Elke Suid-Afrikaner ly onder plaasmoorde. So sê Jan van Niekerk, Vryheidsfront Plus-leier in die Vrystaat in reaksie op nog ‘n plaasmoord Dinsdag.
Die moord op die Smuts-egpare van Mpumalanga volg kort na ‘n aanval op die Van der Merwe-egpaar van Marquard, wat ‘n noue ontkoming met die dood gehad het, sowel as plaasaanvalle in Luckhoff en Hertzogville in die Vrystaat.
“Februarie ‘n slagting”
Tot op datum was daar reeds 18 aanvalle op plase in Suid-Afrika gedurende Februarie. Dit is meer as een plaasaanval per dag.
Jan van Niekerk, provinsiale leier van die VF Plus in die Vrystaat en self ‘n boer, sê die land staan geskok en moedeloos na die soveelste aanval. Hy sê dat mens nie anders kan as om woedend en wanhopig oor die elf plaasmoorde in die afgelope twee weke te voel nie, om nie eers te praat van die duisende voorafgaande plaasaanvalle en –moorde nie.
Van Niekerk sê die impak van ‘n plaasaanval is baie meer verrykend as wat ‘n mens sou dink.
Landbou skep werk
“Voedselsekerheid en die bydrae tot die BBP is van die faktore wat skade ly, maar die sosiale en sielkundige impak op plaaswerkers en landbouers en hul gesinne is onherroeplik.“
“Op dieselfde dag het Statistiek Suid-Afrika die werkloosheidsyfers vir die vierde kwartaal van 2016 bekend gemaak. Die werkloosheidskoers is 1.4% hoër as dieselfde kwartaal in 2015. Die landbousektor het 919 000 werknemers in diens en verskaf jaarliks aan 6.9% van die arbeidsmag werk, dit is die tweede meeste van al die industrieë in Suid-Afrika.”
Jan van Niekerk
“Met slegs 35 000 kommersiële boere in Suid-Afrika is die skade wat ‘n enkele plaasmoord aan werksekerheid en die welstand van werkers se gesinne aanrig onherroeplik,” sê Van Niekerk
Hy sê die landbousektor is reeds onder soveel druk met grondhervorming, die gevolge van die droogte en die konstante bedreiging van boere en plaaswerkers se veiligheid, dat ons nie kan bekostig om terug te sit en die status quo verder te aanvaar nie.
“Elke Suid-Afrikaanse burger moet besef dat hy of sy indirek deur elke plaasmoord geraak word. Dit is tyd dat ons as landsburgers opstaan teen hierdie sinnelose geweld wat tot hoër voedselpryse, onsekere ekonomiese toestande, toenemende misdaad en die uitmoor en verarming van ons medemens lei.”
The post Plaasmoorde: Slagtings raak almal appeared first on Radio Rosestad 100.6FM.