Die ad hoc-komitee wat die SAUK-raad ondersoek, eis onmiddelike optrede
van die polisie nadat Suna Venter, SAUK-joernalis en een van die sogenaamde
SAUK-8, onlangs vermoedelik met ’n windbuks in die gesig geskiet is.
Sy is buite ’n wegneemeteplek in Linden aangeval.
Netwerk24 berig dié nuus het aan die lig gekom nadat ’n geskrewe voorlegging deur Venter aan die ad hoc-komitee wat die SAUK-raad ondersoek, gedoen is.
Die koeëltjies is by die Sandton Mediclinic verwyder.
Die voorval vorm nou deel van die ondersoek van intimidasie teen Venter en die ander SAUK-joernaliste.
Daar is onder meer met keramiekkoeëls op Venter geskiet, by haar woonstel ingebreek en haar woonplek is omgekrap, haar motorruit is uitgeslaan, haar motor se rem-sensors is op drie wiele geknip en sy het talle dreigende SMS’e ontvang.
Die polisie vermoed dat die voorval verband hou met die dreigemente wat die SAUK-8 – joernaliste wat die SAUK se omstrede redaksionele beleid bevraagteken het – vroeër ontvang het.
The post SUNA VENTER: KOMITEE EIS OPTREDE VAN POLISIE appeared first on Radio Rosestad 100.6FM.