Borgtog is in die landdroshof op Middelburg in Mpumalanga geweier aan die sogenaamde doodskis-beskuldigdes, Theo Jackson en Willem Oosthuizen.
Hulle sal in die tronk in eMalahleni/Witbank bly tot hulle volgende hofverskyning.
Landdros Jongilizwe Dumehleli het gesê die aanval was rassisties, en dit is duidelik dat daar ‘n groot waarskynlikheid van bloedvergieting sal wees indien hulle op borgtog vrygelaat word.
Jackson en Oosthuizen staan tereg op aanklagte van menseroof en aanranding met die doel om ernstig te beseer.
Intussen is dit onbekend wat van die doodskis geword het waarin Victor Mlotshwa gedwing is.
Monia Nyuswa, woordvoerder van die nasionale vervolgingsgesag (NVG) in Mpumalanga, het buite die landdroshof in Middelburg gesê dit sal in die twee se verhoor duidelik word wat van die kis geword het.
Nyuswa wou nie kommentaar lewer oor hoe ver die polisie se ondersoek in die saak teen Willem Oosthuizen en Theo Jackson gevorder het nie.
The post DOODSKIS-VERDAGTES BORGTOG GEWEIER appeared first on Radio Rosestad 100.6FM.