Groot dele van Bloemfontein is vandag nog sonder kraanwater, nadat Bloemwater vermoedelik nie betyds genoegsame skoon water in die Brandkop opgaardam kon pomp nie.
Dit kom nadat troebel water vermoedelik vanaf die Caledon-rivier in die Bloemfontein herleidingstelsel beland het.
Die watervoorsiener kon na bewering nie betyds die water filtreer nie.
Die gebiede in die stad wat óf geen water het óf `n lae waterdruk in krane ervaar, is gedeeltes van Pellisier, Lourierpark, Ferreira, Kwaggafontein, `n gedeelte van Langenhovenpark, en moontlik Universitas.
Hoewel die water waarskynlik nie helder is nie, het Bloemwater inwoners verseker dat dit veilig is vir menslike gebruik.
Watertenkwaens word ook vandag na die onderskeie woonbuurte gestuur om inwoners van genoegsame water vir huishoudelike gebruik te voorsien.
Die situasie word streng gemonitor en Bloemwater werk onverpoosd om dit te herstel.
The post DELE VAN BFN STEEDS SONDER WATER appeared first on Radio Rosestad 100.6FM.