Met die nuwe skooljaar wat môre begin, is daar nog 58 000 graad een en
graad agt-leerlinge in Gauteng wat wag om by skole geplaas te word.
Die woordvoerder van die provinsiale onderwysdepartement, Oupa Bodibe, sê daar gaan nog probeer word om soveel moontlik leerlinge in skole te plaas.
Die afsnydatum vir ouers om aansoek te doen vir kinders om by skole geplaas te word was 1 Junie 2016.
Volgens Bodibe sal die kinders van ouers wat eers vanjaar aansoek gedoen het, moontlik eers teen Maart vanjaar ’n plek in ’n skool kry.
Honderde leerlinge in die Noord-Kaap is intussen weens die beperkte ruimte in skole nie vir die 2017 akademiese jaar ingeskryf nie.
‘n Groot aantal ouers en leerders het by skole begin toustaan voor Woensdag se opening van die skole landwyd.
Die Departement van Onderwys sê hulle het maatreëls getref om seker te maak dat alle leerders in skole geplaas word.
Die LUR vir Onderwys, Martha Bartlett, sê hulle het die leerders reeds verlede jaar al geplaas, maar sy het daarop gewys dat dit nie net die Noord-Kaapse kinders is wat na hulle skole toe gaan nie.
Bartlett sê baiekeer verhuis mense van ander plekke na die provinsie en hulle bring hulle kinders saam.
Sy sê daar is wel klasse wat wel lyk of hulle oorvol is, maar hulle het verlede jaar mobiele klaskamers verskaf en sal weer aandag daaraan gee.
The post DUISENDE LEERLINGE MOET NOG IN SKOLE GEPLAAS WORD appeared first on Radio Rosestad 100.6FM.